Overfinch-dən Range Rover Sport GTS-X
Dünyada Range Rover avtomobillərinin ən yaxşı tünerlərindən biri olan “Overfinch” hazırkı Range Rover Sport variantı üçün yeni paket elan etdi. “GTS-X” paketini bu yaxınlarda yeni modellə əvəz olunacaq “Sport” variantı üçün vida hədiyyəsi adlandırmaq olar. Amma yenə də “GTS-X” komplekti “Range Rover”-ə 575 a.g. və tam yeni görünüş verir.
5.0 litrlik 8 silindrli sıxıcı kompressorun kifayət qədər güclü olduğunu nəzərə alsaq belə qənaətə gəlmək olar ki, mühəndislər çox işləməli olublar. Lakin “Overfinch”-də bu heç kimi saxlaya bilmədi, tünerlər mühərriki yeni hava kamerası ilə təchiz etdilər, o cümlədən işlənmiş qazı çıxaran sistem və mühərriki idarə edən blok yenidən dəyişildi.
Bunun nəticəsində güc aqreqatının məhsuldarlığı 575 a.g.-ə qədər artdı. İndi yeni yolsuzluq avtomobili ilk “yüzü” cəmi 5 saniyəyə yığır, onun maksimal sürəti isə 233 km/saatdır. Belə yüksək sürətdə avtomobilə nəzarəti təmin etmək üçün “Overfinch”-in mühəndisləri yolsuzluq avtomobilini 22 düymlük disklərlə təmin etdilər, avtomobilin yolsuzluqda rahat hərəkət etməsini saxlamaq şərti ilə onun an aşağı hissəsindən yerə qədər olan məsafəni aşağı saldılar.
Bodi-kitin tərkibinə yenidən baxılmış bamper və asma əlavə olundu. Daxildən isə avtomobil narıncı rəngdə dəri ilə işlənilib. Sözü gedən yolsuzluq avtomobilin qiyməti 235.000 ABŞ dollarından bir az azdır.
