Ferrari yeni superkar təqdim edib
Ferrari şirkəti Yaponiyadakı 50 illik fəaliyyəti münasibətilə superkar J50 təqdim edib. On ədəd tirajla buraxılacaq yenilik 690-güclü mühərrik və markanın ötən illərinə məxsus üslub cizgiləri alıb.
Şirkətdən bildirirlər ki, yenilik 1970-1980-ci illərdə hamının sevdiyi Ferrari-ni xatırlatmalıdır. Bəzək işlərində GTO və daha əvvəllər buraxılan F40 və F50 modellərinə aid istinadlar görmək mümkündür.
J50-nin xarici görünüşü, həmçinin aerodinamik karbon elementlər, 20-düymlük döymə disklər və tam diodlu optika ilə seçilir. Yenilik donor rodsterdən elə həmin 3,9-litrlik tvin-turbo V8 mühərrikini alıb, lakin o, 488 Spider-dən 20 a.g. daha güclüdür.
Dinamikanın göstəriciləri barədə şirkətdən məlumat verilmir. Qeyd edək ki, Spider ilk yüzlüyü 3 saniyəyə yığır, 200 km/saata 8,7 saniyəyə sürətlənir. Maksimal sürət isə 325 km/saatdır.
Ferrari hələlik yeniliyin hansı bazarlar üçün nəzərdə tutulduğu və neçəyə satılacağı barədə məlumat vermir.
