Audi avtopilotu olan sportkar təqdim etdi
Şanxayda keçirilən istehlakçı elektronikası sərgisində “Audi” şirkəti avtonom idarəetmə sisteminə malik ən sürətli avtomobil konsepti təqdim edib. Yenilik elektriklə işləyən kupe “R8”-in bazasında yığılıb. Avtopilot lazer skanerlərindən, videokameradan və ultrasəs sistemdən məlumat alır.
Almanlar avtonom idarəetmə sistemi ilə yanaşı, “R8 e-tron”-da “Combined Charging System” (CCS) adlandırılmış yeni yükləmə sistemi də nümayiş etdiriblər.
Onun sayəsində elektrokarın tam yüklənməsi 2 saata qədər tezləşib, akkumulyatorları doldurmaq üçün daimi və dəyişkən enerjidən də istifadə etmək olar. Tam enerji 450 km məsafəyə çatır.
Avtonom idarəetmə sistemi 2017-ci ildə seriyalı “Audi”-də olacaq. Əvvəllər bildirilirdi ki, avtopilotu olan yeni nəsil “A8” sürücüsüz 60 km/saatdan bərk getmir. Elektronika hərəkət zolağını dəyişə bilir, dayanır, dönmə işarələrini yandıra bilir və park etmək üçün yer axtara bilir.
